Владимирская-Десятинная икона Пресвятой Богородицы

 
 
 

Тропарь, глас 4:

Днесь светло красуется град Киев, ликуя славному Твоему явлению, Владычице, Десятинной бо обители милость Твою посылаеши, и нас от всякия беды избавляеши. О, Пречистая Матерь Света, в песнех воспетая, избави от болезней и скорбей всех, присно молящихся Тебе.

Кондак, глас 1:

От святаго образа Твоего, Богородице Дево, благодать Святаго Духа истекает обильно с верою и покаянием притекающим к нему. Темже и мы прославляем чудеса Твоя, во умилении зовуще: буди спасения нашего Ходатаица, благодатию Твоею, Владычице Пречистая.

Молитва

О, Пресвятая Дево, Мати Пречистая, Родительнице Невечерняго Света, Царица неба и земли! Ты явилася еси людем в Десятинной обители Твоей во граде Киеве, показавши нам милость Твою и утвердивши людей Своих в Православной вере. О, святая Госпоже и Царице Богородице, призри с высоты святыя Твоея на нас, грешных рабов Твоих (имя рек), припадающих к цельбоносному образу Твоему. Услыши прошения наша, с верою и любовию приносимыя Тебе. Умоли Сына Твоего, Христа Бога нашего, да сохранит град сей [или: святую обитель сию, или: весь сию] и вся грады и страны от глада, губительства, земли трясения, потопа, огня, меча, нашествия иноплемеников и междоусобныя брани! Подаждь благость Твою рабом Своим, даруй любовь и смирение, мир, тишину и изобилие плодов земных. О, всемилостивая Дево Богородице, Ходатаице спасения нашего, умоли даровати нам наследие вечных благ Царствия Небеснаго, сохраняя нас под кровом Твоим, всегда, ныне и безконечныя веки. Аминь.